Percorre a costa da Mariña lucense saltando de porto en porto e saboreando os nosos mariscos e moluscos máis representativos como o ourizo, o polbo da pedra ou os chícaros (berberechos).

Época recomendada: verán / todo o ano (festas espalladas)
Tempo: 5 días
Levámoste por:

  • O Vicedo
  • Xove
  • Cervo
  • Foz
  • Barreiros
  • Ribadeo

Sabías que?…

Ribadeo é a primeira parada do tren FEVE en Galicia, que pasa por todas as localidades que atravesa esta Ruta do Marisco. É un medio de transporte sostible para coñecer o territorio!

Paradas

Porto do Vicedo (O Vicedo)

O porto do Vicedo, a carón da ría do mesmo nome e situado no municipio do mediático miradoiro do Fuciño do Porco, destaca pola súa tradición marisqueira. A modo de curiosidade, contámosche que aquí hai 3 minicriadeiros de ameixa, cadeluchas e ourizo dependentes do Centro de Cultivos Mariños de Ribadeo – CIMA (Xunta de Galicia).

En maio, durante as xornadas gastronómicas da ostra, a hostalería local ofrecerache exquisitas preparacións deste molusco bivalvo da ría para dalo a coñecer e potenciar o seu consumo.

Porto de Morás (Xove)

A segunda parada recomendada desta ruta é o obradoiro tradicional dunha conserveira onde preparan polbo e bonito de Burela.

Na segunda quincena de xullo (a data depende das mareas), Xove celebra a Festa do Percebe na que non falta música de charanga e actividades para nenos.

Antes, en Semana Santa, hai outra data sinalada. O Xoves Santo ten lugar a Festa do Polbo da Pedra, denominación coa que coñece a especie que se captura neste tramo de costa. Este é un cefalópodo de altísima calidade cunha cor máis escura có común, raxos máis longos e cabeza máis pequena.

Aproveita para pasar polo cabo de Morás e o faro de punta Roncadoira. É un lugar salvaxe a pesar de non destacar pola verticalidade dos seus cantís. A plataforma do faro, con torre cilíndrica, serve de miradoiro sobre o horizonte do mar Cantábrico, a ría de Viveiro, as illas dos Farallóns, a de Sarón ou incluso illa Coelleira (oeste). Prismáticos en man, verás alí un dos seis faros que hai na Mariña lucense e unha gran reserva de aves migratorias (uns 15.000 niños).

Porto de San Cibrao (Cervo)

A abundancia de ourizos nas súas augas converte ao concello de Cervo na capital galega deste curioso marisco. É moi habitual nas cartas dos restaurantes locais que, durante a Festa do Ourizo de San Cibrao (entre febreiro e marzo) son os seus principais embaixadores preparándoos en croquetas, empanada, tortilla, ao natural, cocidos ou en pudin.

A hostalaría tamén se involucra coa degustación da Festa do Mexillón cada sábado de Semana Santa mentres é amenizada coa actuación de grupos folclóricos da zona.

Co estómago cheo, parada obrigada en Cervo é a Real Fábrica de Sargadelos, historia viva de Galicia. Aparte da exposición, da galería ou do Paseo dos Namorados, paga a pena achegarse entre semana (mañás) para seguir o percorrido sinalizado por toda a fábrica e ver aos traballadores mentres fan as súas tarefas con toda naturalidade, dando forma a estas famosas pezas brancas co seu característico cor azul cobalto, verde ou vermello.

Aproveita a estadía en San Cibrao para coñecer os 200 anos de historia da única carpintería de ribeira tradicional da provincia de Lugo, e unha das 20 galegas; o Museo do Mar, o primeiro da nosa comunidade; as antigas fábricas de salgadura; ou o faro de punta Atalaia, con espectaculares vistas. O Sendeiro Azul O Torno en San Cibrao vertebra todos estes lugares de interese.

Se andas por aquí en agosto, vive coma un veciño máis dúas Festas de Interese Turístico: a Maruxaina (2ª sábado), durante a que se escenifica unha lenda mariñeira, e a Queimada Popular (sábado seguinte ao 16).

Portos de Foz e Barreiros (Foz e Barreiros)

A mediados de maio celébrase ao mesmo tempo en Foz e en Barreiros a Festa do Bígaro, con degustación de tapas e de racións na hostalería local.

Unha boa opción para coñecer a zona e o seu patrimonio é camiñar pola Ruta das Praias, entre a casa do concello de Barreiros e a praia de Arealonga (Foz). O castro de Fazouro (Ben de Interese Cultural, BIC) é o único poboado castrexo costeiro escavado e musealizado na costa cantábrica galega. Fíxate nestes cantís rectos, de escasa altura, chámanse “rasa cantábrica”.

En xaneiro, Foz, a vila turística máis concorrida da Mariña, acolle a Festa do Chícaro, nome que aquí lle dan aos berberechos. Para a cea, marida a primeira cervexa artesá da Mariña con hamburguesas “gourmet” de produtos do mar.

Vila mariñeira de Rinlo (Ribadeo)

Antes de chegar a Ribadeo, colle o desvío cara á Rinlo, tan famosa polos seus percebes como polo arroz caldoso con marisco. No calendario de xornadas gastronómicas do verán non podía faltar a súa Festa do Percebe, entre finais de xullo ou principios de agosto (varía polas mareas).

A poucos metros do peirao, seguindo a pasarela de madeira sentido Foz, atoparás a primeira das 3 curiosas cetarias naturais que había en Rinlo. Esta data de principios do 1900 e estivo en activo uns cen anos.

Desde aquí, un “curto” paseo duns 5 km a carón da rasa cantábrica (1 hora a pé e 10 minutos en coche) levarate ata outro“imprescindible”: a praia das Catedrais, monumento natural de gran riqueza paisaxística. (Recorda que no verán e Semana Santa precisas reservar visita.)

Porto de Porcillán (Ribadeo)

A 10 minutos en coche de Rinlo está o porto de Ribadeo. O peirao de Porcillán é a principal entrada de mercadorías do noroeste galego. Unha ruta pola ría descubrirache as artes e praias para o marisqueo e incluso poderás vivir in situ unha xornada coas mariscadoras, visitar cultivos de ameixas, muíños de mareas ou unha antiga fábrica de algas.

Completa a túa experiencia nas Terras de Miranda!

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies